Alguien dijo: "Los cuentos nos ayudan a enfrentarnos al mundo"

Era se una vez...

8-2-2015 a las 21:47:50 10.000 relatos y 10.000 recetas

10.001 relatos en tiocarlosproducciones

10.001 recetas en mundi-recetasdelabelasilvia

Translate

lunes, 2 de febrero de 2015

Los tres reyes .091 dwone

Mbwe, Ndjambu diya, alonga mboka na betoko kota.
Mepolo melalo mebetyendi. Umboko na ekabala, umbokwe na ele edjayaka bebuma biasa, umbokwe na vinyoni.
Mobetye na ele, abetyendi na mwamwado nyeve nyeve mazizi. Avavoko na, moto amaviaka iba dja mwame, alukandi aviaka ngwe na vinyoni me vedjungulengwe bebuma bia elemeni.
Djoka ra, epatye'voko a mwana avaviaka e mbok'opolo mu namu na natokandi ebaya mwave.
Yondi voyo upolo namu na, rebo eye ngwe sebweni yondi en¡: etondje eviyatengwe na vinyoni me vedjangwe bebuma me biasa bia ele meni, kete ebana na mwame.
A momu na ebenapati. Betye ngwe ndjale, namandi longoko vinyoni ke na viyave na vio. Mu tego ndjale pwe, botyetye nayo e mbadi. Mu tego bia, amuyayaka na'manda yaye, yaye, kwanga vabetye elu epaba, mumu tego bumwaka. Alondjenga tego atoyoko vinyoni vedjaka bebuma ele'loba. A momu dee, engaka ndjale tego ubondo geba. Vinyoni bovevetye, kabo egago'voko ndi ekwetye. Mu tego yo pwe, avatyetye nayo e mboka upolo.
Mu na upoloame, egago meni ndi a vinyoni vebene veviyadjaka bebuma bia eleave. Upolo namu na, poni, poni; yondina elukandi etokaka moto aye nga vinyoni mevira, ke evoko namu na ngwe navondina atayetye ngwe vinyoni mevira tinandi veziyandingwe bebuma bia el'ame. Ke ito mu mba tayaka ngwe vinyoni, kete ataya ngwe ele evokwe na bebuma beziepi.
A momu botyetye itoka dja moto abetye nga vinyoni. Songe madiyaka upolo umbokwe. Avatesebwakamu ene nga sebwetye upolo a el'abebuma. Yondi etoyo upolo na, abengudi timbiye ele na bebuma, avatevoko namu na ingaka vinyoni ke etyeye navio; nabengudi'lindje vinyoni na besebo bia mba pulenetye.
Mu vinyoni pwe, avatyetye na vio e mboka motyiadu, mu namu na vinyoni ndivinana. Yondi vo motyiadu namu na: mbanbaye, eviyandi ngwe na vinyoni, nandi namandi djombetyeve imavokwe. Mokodi me motoyove epwandja mura, elukandi evendjiyetyeyo, tinandi natokandi ngwe eva diya ke natoyoko manga bwe.
A momu ibaku pwe na mabo kbo, kbo, kbo, ngode'gugu, mokodi ene ima tima esowe. Momu umboko avakudwenetyemu, yondi ipwamu namu na ¿esandi inde? Mu na natokandi boya mokodi memu, ke nalikaka zie vevele. Nandi na ngwe na djandja natoyo yo moboyamaka. Avaviaka na nyama nyezepi nye bene nye vwasaka zie. Eviya mombo, betolo, ngomba, liyo, na nyama nyevokwe nyebolo. Wa e bolomera djandje, djandje pa, mokodi vevele mbago pulenetye na mokodi mo betyendivo, manga pwaa.
Yondi vo ubayi na, motyiame, mazia nave. Motyiadu namu na: nandi evotye ngwe na amabetye abayaka mwame alukandi avendjietye ngwe mokodi me modiba ngwe manga.
Mu namu salangano; avatayakamu vinyoni, na ele na ekabala na mwadu. Mu na ovendi eluka ediyaka upolo a mboka meninana tinandi lega toyoko djambo dja djongomedji, lebepikiliyetyena moto nogugu ayendi ngubi vendjiye mokodi memunana, vayena ovendi edjandjiye ebutyeme etubwe nangudi en¡, ovendi eluka epangaka mboka meziepi en¡, eviya manga natye pabaka ezityi, ovendi eluka esaka upolo. Mu na gumba na mwado na bema biezie tyetye nabio.
A momu bema'biadu pwe, etyendo. Mundi amutyetye mura. Vabetyemu amuvaba vabe na mboka a mwado, moto me abetye akudwuanakamu vabetyemu aboyaka mokodi, mu pwandja adu de.
Yondi vomu namu na: ene nga tyetyevena, ema kobetye wato waba ediba wamienetye; mba tye sanakawa, etondje etyeye iwedidjave djondi djira. ¿Okate? Mu na e, noka.
Mu rope etyendo, tamwe, tamwe, alondjenga ke ediba na wato waba wamienetye na: e, e, e, rand'atyenoe, rand'atyenoe, soso, vasanetyiweo, ngwe na tyewene na eningonoo, viaka vapayetyen-gweo. Mu tego de, mu na o, ndi natoyo moto awaka nga ke poni na tingaka molema, navayole. Mu tego botyetye vabetyewa ediba teyi, avoyena adulandiwa, umbokomu bobomboko ebo tego, bodulakamu wui, ibweti namu tyo na ediba, amuleluwenetye na tonda. Wabototomoko umbila, boingaka mwado na ekabala na ngumba ezie, waetyendo nayo kwanga na e mboka.
Pabaka na e mboka tego ekabala imbutye, tene mwado na vinyoni, mba kalaka rebo te rebo: Azirwetye mupatu, patu, atyetye na tonda. Elongome nga atoye momu memura epwandjaadu, mu namu na, ¿nabe voyove na otyetye metati mia watome wara? ¿Etote iboko djeyeve etyatyava? Mu namu na ebenapati, enyotye, ima tima evadola nave. Epuletyena vamapayakangweve e ndjuke meni, malityiyene ndi manana, evago toyo ngwe rope.
Mu namu na tyetye, emateto vamapabakave e mboka emateto nyanga ma kwaka rebo.
Nepabidi dje pabetyemu, a mwado atoyokomu, na ekabala, na vinyoni, waziepi umbila isosene namu; wamukalienetye. Wato poni selele, wana remendininana, ¿ebevokonina inywendini nga mwado na beema me bieziepi binana?
Avaondiyetye wato, muwa po ezie bome, bome, djongo djezie djesetye wananyangwe wasakamu.
Etomba evavoko na walikandi wowetye. Yondi evoyomu na, woyetye moto te moto, kabona, atoka adiyaka nawa iboko ivoko. Wavate putakawa e mboka, warnutye watye lengaka ibokotiboko.
A momu avalikanaka na mwadadu, na ngumbaadu, wadjayanaka diye diye.
Na ngwe na viaka'rago, na ngwe na timbaka.

Versión en lengua dwone

Fuente: Jacint Creus/Mª Antonia Brunat


0.111.1 anonimo (guinea ecuatorial) - 055

No hay comentarios:

Publicar un comentario