Ebetyendi
nga, ke ebebe nga. Momu'mboko abetyendi na wana walalo. A motodu
avaviya tyetye idjandja. Nga ebetyemu ero ko, ko, ko, avaviya
duwamaka na ngumba eboliboli, amumoto utubwe e mboka mera.
Yondi
evoyo ndembe'nyadu na iwe lesikama'toka ebaya. Mu na wana rebo ebe,
mu wa ngumba botayaka egala na wabayetye. Avabadjetye ndembe'nyadu.
Yondi
ipwa gangwe epwaka mu na, ove ¿ega tokaka ebaya? Mu na nyawe, naga
tokaka ebaya, na tele ikwa na bogo.
Nga
betyemu sukulu se, se, pa, avavoko na gangwe na, na tele kendje
etyendo, Gangwe namu na tyetye.
Mutyeye,
tyeye, kwanga avakobetye tyapendi evoko edjandjaka e ¡toba djadu.
Yondi ipwamu na mwana ría ¿etyendi eve? Mu na natokandi ipaba dja
mboka meaanu en¡.
A
mwana tego botyetye kwanga na e mbadi atyapendi mera. Avakobetye
mwadadu, avakendjetyemu bedja bia mwako, kafe na wana bedja bevokwe.
Mwada
tyapendi abetyendi na mwamwado, avavoko mu na, temetye e umbio, ke
ito etoyo gongwe aviaka ke esebwa ngwe. A mwana tego botemetye de na
e umbio. Nga betye gangwe amuviaka, a mwana na nyangwe poni na, iyao,
tata asikama'viya.
A
mwado bobotaka mwa me a momu mura e koboti e velwe bedadi,
avabombiyetyemu ilale. Mu namu na, etondje momame abakama e koboti me
eyeve, ke ingwamu djo e mondongo.
A
momu we na e mbadi, amutye atye longoko, avaviya bakamaka na koboti;
mwana boingwakamu ilale na e digo.
A
momu abego sa sembi kabo botimbaka na e itoba'djadu.
Mwa
me a momu mura bokudwaka e ¡boto dje betyemu, tego botyetye na
vabetye momu memura. Mu namu na, ¿reme ndi esawe e digo? Tyapendi
mera namu na, na bendi na tyeye e mbadame, ke na pule moto nogugu abe
e koboti avaviya ingwaka ngwe ilale na e digo.
Yondi
e timbwana mwa me a momu namu na, ngwe tego na ingwandi momu umboko
ilale e digo vabemu atye atye longoko mbadi.
Tyapendi
mera amutuma, apikiliyaka. Mu na rebo me esebwa mwa meno esandi ene
ima me edola na ngwe, rovoko mundi adjandjiye ugono memura na ngwe;
na ngate pule rebo mera djoba ne gugu.
A
mwana botimbaka rope e mboka amwada tyapendi. A mwado avakendjetyemu
bedja ene djob'ivokwe. Mu na mwadu na temetye e umbio, elongoko
etondje gongwe aviya ke esebwa ngwe. A mwana vabetyemu atoyo gangwe
aviaka, avasebwaka nyangwe.
A
mwado avabotaka mwa me a momu mura egala teyi swa.
Ipaba
dje pabetye momadu, avavoko na natumbandi mbadi meni; etondje moto
nogugu ayendi eteyi ke amudikaka. Amudityiyetye mbadi. A mwado namu
na, nga dityiyeve mbadi, napayandi egala-ame, tinandi navetyendi nayo
e djanga 'djame vabayetyeve ngwe. A mwado amudulaka egala, onge eteyi
ndi ebotetyemu mwa me a momu mura.
Mbadi
ezie ditye, ditye, pa, mba moto akobenetye weni. Mwa me a momu mura
avatilaka kwanga na e mbokaadu.
Avaviya'voko
na gangwe na etyatyava. Yondi emutokaka ngwe ebaya, tinandi na mundi
puletye nyanga eluka ngwe na diyaka na mwado na betoko.
A
mwana avatebayaka ngona mwado. Waziamu diya, diya. Yondi etongina a
mwado momu umbokwe, waziamu wavasaka matondi. Mumaguna momadu apule
ima tima, songe a momu adingandi akengetye ebolo e djandjiye mwadadu
na momu umbokwe.
A
momu avavoko na mwadadu na, etondje ove mba sebwaka ngwe ebutye e
djandjiyeve e mbadi me eninana ke na leviyeve ima na'gugu. A mwado
avasebwakamu bema bezie bebenernu adoliyetye na itondi djadu.
Momadu
avateidjenetyemu, wamudiyaka e mbadi dodo ene nga'diya wato watwe.
Na
ngwe na viaka ro, na ngwe na timbaka.
Versión
en lengua dwone
Fuente:
Jacint Creus/Mª Antonia Brunat
0.111.1
anonimo (guinea ecuatorial) - 055
No hay comentarios:
Publicar un comentario