Moxi nafobengue ku omedef ku n'ngwe dome del .087

Wan telá sé sajan piskadóló. Sé saku mosso dós, zugan namonese na sa ku m'naf. Pix neix jabi jóli y ja patyiney tudu detu detu, wan namonensay na já ngongó pa óme dé ja fa ku zugán guéf nyi n'gwe dome déf, moxki na ja sa ta vef.

Masesay ngongo saku wan sápa mosso, da óxi y samasé ngongó ku namay, jóxi ke ná ngongojof sa peney dódós ja sa ku guela.

Móxi ja sa fe guela da ome tuvé tuvedji, pixi nexi pejajdjidé ja sa dalí y na ja kunfá sé ja sá gada pe dantu jamia sé ja sa ja fenda, ta ja sa fendá sé sa óxi ke jáma ke já kudji, moxki ja kudjidjidel fésku.

Pa namsedji bé da jónta kun féfé nenxi ke ja sa kurnu olatuvédji y ja sr dantyi.

Tyipa deli ja sá ta fumadu mosó, ja sa tya zugan fenda doventu, y ja dangwé ku fenda mulfutu, y ja sa gada omedé já piska ta mosala jamatu sé ja lantá vadji mosala se ja jobo jobó se ja fe lontogopé, ta'ka jasá badjuní sé fumba já lanta te jabangwé pinya.

Masebu ku mosala ola tuvedji y ney ja sá pufia da jántu fenda d'ógó, xi ta da djia sé ney fa pé ne ba bé wan n'gwé dófia.

PC dófia na dá ney lazan n'guixi janda ja fe josséf, jóxi ké da ney lazan sa jaméxi fenda lontógo ska sé fól, y la¡ y tenda ney wan nguinyi nguinyi, pa y ne pe jadji ja sa nguixi ja fé ógó pé ney fo sé nguíxi. Ta ké ney bada jadji sé ney ten fe jonéxi ka fá peney fé tudu.

Sé ta tamba da notyi sé tan jólé guidi guidi tan bá ógó se jóssé lantal dantu dógué, ta ké ja sá badjuni se jasa da nyec, nyec, nyec. Sé lanta pé bé joxi sa ja % tomen tásay sé jua ja bé zuganjaf, sé tusán liba jadéla sé tan tendé. Nye, nyec, nyec... Ta ké játa mdjadu se jóssé ja tyamá n'da, ta ké tan ja tusan sé tan ja jomesa jáda, sé dé ótendefa jósse sa ja jadá dantu tyipa dél.

Tadadjia ku medu dél tan ba tamadé ba djuni se mósso na ja ngongó ba djunif, sé pongoté:

-Já fé ba ngo tu sanf.

-Sé falí y na padjif.

-Bam non bam dantú jotyian pa ba'djuni.

-Sé fali djuni na saja mef, sé mandé badjuni afox, ta ne bé mosso se téndé nyec, nyec, sé lanta sé fal, mse nguixi ja fe fenda fé béla, bo sé sa ja fé josay, ma já pobo sé fó opemu me nta ngongo be bof, sé pende ome fodexi.

Sé ye sé no jabapé.

87. La mujer celosa.

Versión en lengua ambú

Fuente: Jacint Creus/Mª Antonia Brunat

0.111.1 anonimo (guinea ecuatorial) - 050