Josolo ku totyiga .023

Josol ku totyiga, yney tudu jata lem: yney sa wán jamada gódó, ijól se ja danda. Familia diney já pasafey dá faku, zugángwé tan ja sá molé da fakú xi ké ney sa ja'ma. Sé ne maznafa tá pé ney fé matu, waxí yney jafó sa ku já pa lanja demtyi max, se ney fé matú nyi na ja da gól joney pé né fo kunf.

Wan pamasedu ké ne tan sa ja matu ba tyalba, sé ne fa péne pasa benda patyi dógó. Tá ka ba dalá lomé jamagantyi sé ney da jonta ja alka, ta ké ney blaalkase sé ne da jonta ján josan djielu, wan sapa djie bóbó. Sé ne ma alkasé sé ney tya fo jamagay se ne jondé pe wan jamá ke ne mo sésebé tadaxi pamasetudu se ney ja la bá ja pé ne ja má kumpa dixamentu diney.

Pów kinté kinté tudu sa kú óyó liba diney da oxi ja kan sa be ezaf: falia dine ja kún jóxi ké ne ngóngojól, na m'na na tan ja n'da jopé dodjif, zugangwé na sé jamexi ke né ja tya djie fof.

Non tu jonsé totyiga amexi ké sá dadalandél ku fengwé danaduxi sa jól, sé ngo pa jatú sa jadél.

Ta ba da wan nótyi se lantá, se v'la mematu jaméxi ke ne gada alka pé. Sé tuka alkasay ku wan patadu sé ma ixki sé fo gada pé anjamá patádu.

Ta ba dá pamasedu sé ku jamadade tótyiga majá se ney tan v'lá mematu, ta ké ney badala sé ney na befa, sé ney dá pún métésula se ne majá se neytan v'la jadji. Kaba jójósóta pé.

Jósóló na jonfa totyigaf, sé fi djihé xi fuga jó sébé sé fo kumpa wan tyinú ku wan bobolonda a ximé an tombóló. Ta dá nótyi, sé bixi bobolonda, sé ma tyinú se ba olá jadji tótyiga, se jomesa já da ja janta: Bóxi bé ma ba pé jóssé sa ja óma'ma, dadalán.

Janda mole mole, ja fa jósay. Sé ta totyiga tendé josay sé ógué dé jomesa ja dá tatata, ta ke sa sa tende fá tomboku tyinú sé pé fa ja pamet se ská fala, mendú xi ke sa ja mendu sé pé fa naxiolo désé bisán pa bi dé jatigu, ku ja fe sé ké feay ta'ku jósó jansá ke majá ké da táxi, sé lanta se ma alka se ma ba pé jamexi ke tojá ta pasedu tan bla seney tan ba dá jamexi ké ne gada alka pé se tótyiga ta labe se badantu dalba se tya bí. Da óxi ké nágada pé londjie.

Sé tósó fa pa patyí da óxi ke jonsé tótyiga fo iyandopé ba tojá ja bé jása. Pa n'gutu gadá oydiney.

Fo déxi se ne na tanté zugan pufia maxif na jonfa zuganguef nyí ba toja samba bó.

23. El perro y la tortuga.

Versión en lengua ambú

Fuente: Jacint Creus/Mª Antonia Brunat

0.111.1 anonimo (guinea ecuatorial) - 050