Soya afiyu kityi .046

Wan telasé sóya fól Agandji ja tá ku wan menveyu ku m'nadjiminadél ajasamali Afiyu Kityi nada jonta na minéski mojatu dantyifá kaja sa Afiyu Kityi, waya tela say saján sigantyi ku sa Palea ja ku méngue anta ja fo bá plá sagaf danyantu jandumátu.

Wan djiá sé Afiyu Kityi ba lalea bá plawa saga, ta ké plawa kengó tya wan ope sé ba »hoyó liba sé da jonta ku jandumé liba jagadal, non tu sé fa Afiyu Kityi sa wan namasé jolojól, mindji joxi ja fontali sa deke y kityi gau.

Jandumatu na ja sa bél gau, sé jomessa já janta dal:

Afiyu Kityi ya, Afiyu Kityi

bi pen kumbó.

Se Afiyu Kityu fa jandumatú:

Iih, memu fa pe mbi plawa dé seboke,

fape mbibo kuhmu, maa menke bif.

Ta ke bada jadji, sé da lazan pasamentu jonexi fel tudu. Sé memendé pegua dé pé pintyidu pa zugandjia pé natan ba lalea. Se na tenjóxi memendé falif, séhé ma na tató dél se v'la jaméxi, jandumatu sa, sé bada dentyi dé se jandumatu falé sé ngulel se me v'la yójó pé ba jansa, se Afiyu Kityi tya jató dé sé jomessa ja poté lásu tyipa, xii se jandumatu safé ta kidéle, batoja óxi jandumatu ba béte sa'n, waya óxi kena sa mófa y saja mindji pa bi fé la zandél.

Tá ku. Jandumatu ba baté sa'n sé bagué tyipa sé sefó dantu tyipa se jólé ba jadji ba samá n'gutu pa bi wá.

Ta ku bida ya¡ sé non jaba bé.

46. La historia de Afiyu-Kityi.

Versión en lengua ambú

Fuente: Jacint Creus/Mª Antonia Brunat

0.111.1 anonimo (guinea ecuatorial) - 050