Pojodol ku mihe jandumatu .102

Wan tela sé saján pay jan mai sé ney sa ku m'na teix, y ney se jadji, ta ku yney tudu gantyi sé ney fa mendiney ku pediney y ne ngantyi za, y ne saja útul pátyi ba jua mosso ku anjajá tabaya, sé aten va ke já ope dejafenda daney se ney ten patyí; tá kéney sajay ka bá da dantu mématu gantyi sé ney da jónta ku jamagantyi teix, maix kityi be jama.

Gantyi s'kedji, sé v'la tá ké sa ja bay sé da jónta jálosso ná losso say y da jónta já namosso ke jazajól, sé ney ten fe jadji se zuntá fl' wan sossó, y lay y ney tensa jana ja dji vendá lidentyi, non tan ska jope táxi maxi metadji bé patyi détu, ja tudu be fe dal. Xi ké mó puvil.

Maxi gantyi be benda dé tu, sé da jonta já losso ximafa na mendexkityi, sé ten jaza já námosso, tá notyi kubili ka ba sánbadjuni se mosso gada djuni ma pay se lánta, sé bada mematu, sé bada wan opé dópá, sé ten sa fé janta, já janta ten bi sé wan miségu, sé ba'ba, sé tya wan santabábla sé misegu sé v'la wan jándumatu, mé notyi say ypasala kú jandumé djigasay, táda mazugadu sé tan bijadji, se medudé pindjé pé dé lazán jamáke fo mé notyi gantyi say.

Sé fal menfo zu ganjamaf. Antolo sé m'seyol, mentadaf.

Tá tanda notyi sé ¡Re ximafanja djun mé béza se mosso tan lanta sé tan v'lu, ta ké tan v'la sé lanta sé jomessa jadé má xi sé ney bada basu dópaxi donte, sé m'dja londji liba wan ópa sé bé jonenxi ké ne fé tudu, sé tan maja sé bi da jadji, tá mosso dé tan bida jadji se tan pongotemé sé tan fal jóxi me, ta da notyi xi tan ske teix djia sé ma já ba mématu ku an piól ké fi' anta ja fe pa mosso dé bay, sé ten jomessa ja jantaxi mosso dél ja jantay, ta ké sa ja janta se tanbí sé misegu sé tan fe jóxi ké ja feay sé tan v'la jandumatu, sé tén jomessa já janta.

Nyato nyanyato

nyanyalobe mi kato

alfa mi kato.

Tá ké jomessa ja janta se vá ku piól de xii sé bada dentyi jadjidél. Ta mosso dé bade ó téndé sé ngongo da budu budu, sé medu dél ten fali, pé lantela dantu piól jóli se ten lantela sé ku misegu jomesa já janta sé bay sé tanfe ameaxi menjadji dé fé óséxi. Misegu sé sajabé ósexi, mindji sé pay fa yku menjadji dé sé sajabay, sé ney tan lantela sé misegu tan jomé sa ja tanta.

Nyato nyanyato

nyanyalobe mi kato

alfa mi kato.

Sé ney tan va xiii badajadji na pay, sé ney % wan taba fessa tábadagolí sé ney tan bida jadji diney tá ké bí seney tojá misegu anto sa ja janta.

I lay mosso sa já kuzu ku ja de laza kuz, sé-pongoté játa pé fi' sé fali pé ney tudu jasá tuka ta'jadagoli péney tudu zunta ba dantul, také ney lantela séne ku piól ten jomessa já maney va, y se na sá va lóngóf sé tan maney ba jadji na pay, sé a tan fé wan tafa féssa. Tádaxi misegu jantaxí se bojo dé moléli sé ponó sé mó pe ala.

Tadaxi se ney ta gau fó deix.

102. El hombre y la mujer del fantasma.

Versión en lengua ambú

Fuente: Jacint Creus/Mª Antonia Brunat

0.111.1 anonimo (guinea ecuatorial) - 050