Magutin ku menveyu .040

Wan tela se soya folo, sehe jóxi mosso sa telasay sa tomenta nam'na, fa janta bityil ku fá lubela. Telasay, saku wan na mosso ka ja samé Magutín ka pél pan flor, jadjidíney saku wan hógo ku sá kú fá dópa, y se nasa ja fómózó xif, bityí nenxi sa mématutudu ala sé ney ja fefadji pé; axi me kalopeta, ólé jadjidél sajam may ó buma buma, zugángwé na ja fó ya bí óla jadjidéfa da fumbáxi ja sa fénda, ja sangó dangwé luzá. Ija sa bojopoto jadjidél ja tusan jágada Magutín pa passa pé mandé bá plawa dál.

Ba toja déxi ke fáli pé limpé oió pé délazan kuz. Sé Magutín na tén pé namdjiskwanfá sé ten jomessa ja limpé oio, mindjí y ja sá ngulí fóxi pé ná luza sé fal: só sé beza, na m'na tudu jasafé gáda, m'plawa dabó béza. Ke já m'tanjafólé wa na m'na mlela xíma fan amu.

Bi lomu oió pen dabo lazan kuz, tudjá tudjia. Wan djia se jansá séhé nguli fóxi sé jomessa já loló. Ta ké ja sa loló se ja sa v'la emadobóyó pel bójó. Sé fal pe tussan pé dé lazan kuz. Tá ké tussan sé dé wan nél. Neli say jonéxi bó ja pindjetudu y ja dabó; séhe saku nél say, sé kesefa y saku jossé ómá.

Páxialé la jata modoya, modoya paké mihé dél sajá dandji, sé da fá bavan pa n'guixi ja saja limedji pa bifé paké y la dá m'ndjan néxi sa tó tudu se mihe na ja lizuf, póu nexi, sé anké limedji tu bay, na ja kulaf, zugangwe ja útu pátyi tenjé fé zugan jaf. Tá da andjia sé nó me délé, pilinxipe fa pédél: I ten saja danda pé ten ba jua anke limedji, se sa jabay, sé dajonta nu Magutín ólajadji ja tussan, sé levalí se mosso tenleval, ilay Magutín bisa ólé jadji ja jozé, séhé ya bá ope déli je jonte passamentu déli, ta ké saja beza se jassa Magutín dá nél, sé tan samé jope bi taxí se badajaméxi ke gada nél pe se má se jolí badajadji sé kudji zugan fa'dópá sé dé bebé, sé fega'nel deli se mle délé lanta se bojo lí ma jadji, ta ku fégada xi fégada paxialé se manda massedé jaza ku Magutín, sé ne pali wan sápa mina nenxi méndiney na palifa se ne ta gau.

Sé sa joxi fe ambo si wa namé jaza angwé, a jafali pé taza ku wan nome táfal pena péndé tóssef.

40. Magutín y la vieja.

Versión en lengua ambú

Fuente: Jacint Creus/Mª Antonia Brunat

0.111.1 anonimo (guinea ecuatorial) - 050