Bibi patu xi na ja lega pa telif .012

Bibí sa wan patu d'ambó ku tassa losso losso, y na ja lega pa zugan bubu ka tyal déf, ¡la¡ y na jata meme d'ogof, y ja da petú ku bóbó, fomózó. Wan djia wan pay, bé patu ndola ndola say séé bingongo tél pa bijo tadji, sé bibí falí: bo ten ja ngongo temu, ma wan budu pa bo tyamu pa se sa jóxi fe za pa bo temu. Tá pe say jendé xí sé bójó dé m'djila betu; séhé bé gá fa ta pé jóxi bibí fal.

Tadaxí se jua budu gay, se tyá bibí say, waya ta ké tyali sé dé ado, pa ké nontuse fá bibí sangwé da ado, da ógue levxí sa tól. Sé budu pesay, vent'a se bada jonta jan galafan tómbó djingwé sé kabela y se na sa já feha feha xif.

Ta xió tómbó sé bé se n'da tope, ku sula pa toje pé ne feguela; y se na sa pufiaf y ne pufa wan bojo tempu gávxi, batoja ku pów pe bójo dantu pada padji tosay. Panamsedji bé n'gutudu lipeveyu paké y fe jonexi ngwé danadu já fe.

Fo déxí sé n'gutudu sé fa bibí na sa patu d'ógóf, y sa wan patu plepal sé zugan n'gwé ntan ja da pizgú télif, se ye se non jaba pé.

12. El pájaro bibí.

Versión en lengua ambú

Fuente: Jacint Creus/Mª Antonia Brunat

0.111.1 anonimo (guinea ecuatorial) - 050