Jassa ngaji, godo ku mumgulu .101

Tom taix ala bibeza, bi saku wan tela; tela say saku pótódóló xi ma fan no ke fa Palea, se saku wan jadji, jadji say saku wan may, wan pay ku na nome teix. Maxi ngandji aja same: jassa ngadji, paké y bi sa jan taba kuz; n'guixi metadji a jasan gódó, se n'guixi kityi a ja san mungulu paké o pe deli bi degue degue muntu. Dawan djia se pediney mandaney ba matu ba pa lanza. Sée ney be xiii ba toja matu se n'guixi ngadji subili, sée ten jomessa ja pa lanza.

Ja ta bi saan se mungulu ja ta ba dantu, d'ojal, gódó, da sée kun tudujaba xüpie, se n'guixi ngandji pa taba ponodu lanza dós kuse sa ponodu nexi mosso tan fuga paké sée fa na mendéli pa n'ta kumfa paké see sa dji na pediney sée ten tabi saan.

Mungulu ma ponodu lanza dós nen say se taba ojalim'dji se gódó fala tudu se tankumu. Se pasanxi mé té nguixi ngandji sée jomessa ja déssé dandjía pebida gódó pajada, se axi jasse déli ngadji xi se pakapé bligadu manga dópa se nta fotyaf xii se mólé, ta féxi se gódó jomessa jali se güela ku tyipa déli xía se tudu labenta sée ten mólé.

Waia daxi se mungulu jólé v'la jadji pée bada lazan jóxi Ree; se jólé mense ope déli tudu lanta wan jobo yam se tudu nabela paké degue degue muntu.

Se nan namayn teix mensai tudu mólé pé mematu; se danda pediney mandaney bafé aü v'la fe jaxigadu se póvi kinté kintélu té dól pediney se luzaney sula, se ku tempu jólidu se ney veyu se mólé bi se ten maney bahi se solla jaba pé yai.

101. El cabezota, el gordo y el flaco.

Versión en lengua ambú

Fuente: Jacint Creus/Mª Antonia Brunat

0.111.1 anonimo (guinea ecuatorial) - 050